Bemvindu mai Vizita Plataforma Online Asosiasaun HAK Timor-Leste. Hodi Haree Informasaun no Publikasaun Asuntu Lian Direitus Umanus. Iha Setór Agrikultura, Bee Moos, Edukasaun, Justisa, Justisa Pasadu, Kazu Rai, Seguransa, Saúde no Stolen Children/Labarik Lakon. |Asosiasaun HAK| Rua.Karketu Mota Ain, Nu.08, Fárol, Dili, Timor-Leste |Kontaktu : +670-78164385|Email : info.asosiasaunhak@gmail.com|
Estudante sira Peskija iha HAK Kona-ba Asuntu Direitus Umanus
Estudante sira Peskija iha HAK Kona-ba Asuntu Direitus Umanus
HAK Entrega Livru Justisa Lia Loos ba Sentru Xanana Gusmao Reading Room Ingles
HAK Entrega Relatoriu Publikasaun Pizaun Kona-ba Direitu Prizioneirus asesu Justisa Formal ba VIII Governu Konstitusional
Formasaun Kartaun Pontuasaun Komunidade "KPK" iha Munisipiu Manufahi foku ba Bee ba Feto
Grupu Toos nain iha Raemea, produsaun hortikultura

Klibur ba Lei Direitu no Justisa

Wednesday, February 21, 2024

Professor no Estudante sira husu ba Ministériu Edukasaun Integra Istória Timor-Leste iha kurríkulu Nasionál

Professor no Estudante sira husu ba Ministériu Edukasaun Integra Istória Timor-Leste iha kurríkulu Nasionál

HAK

Foto/Professor & Estudante Partisipa iha Atividade oron  invazaun Militár Japaun tama mai Timor-Leste ba dala-82

 KOMUNIKADU IMPRENSA

Ejizensia husi Professor no Estudante sira husu ba Ministériu Edukasaun Integra Istória Timor-Leste iha Kuríkulu nasionál, ambitu Komemora Loron Invazaun Militár Japaun mai Timor ba dala-82 (20 Febreiru 1942-45-20 Febreiru-2024 )

Dili-20 Febreiru 2024, komemora loron invazaun Militár Japaun tama mai Timor-Leste ba dala-82, iha funu mundiál daruak lori sofrimentu ba nasaun barak inklui mós povu  Timor-Leste, iha momentu ne`ebá povu Timór kuñesidu ho Timór Portugues. Invazaun militár Japaun iha momentu ne’ebé lori sofrimentu barak, liu-liu ba feto foin sa'e sira. 

Faktus husi istória hatudu katak violasaun seksuál nu’udar violasaun kontra umanidade  durante tempu okupasaun nia laran ankontese liu-liu ba feto foin sa’e sai atan seksuál, eskravidaun seksuál ka ita bolu ho lian Japaun dehan (Jugun Ianfu) sira forsadamente sai vítima, sira nia sofrimentu iha tempu naruk nia laran mai to’o agora.

Asosiasaun HAK  hamutuk ho Soliedaridade husi Japaun ka hanaran Koligasaun Japaun halo peskiza hodi hetan vítima total rua nulu-20 ne'ebé mak hakarak koalia sira nia istória moruk pasadu nian iha tempu segunda guerra mundiál no husi  vítima sira ne'e  maiuria feto ne’ebé identifika ona, ohin loron vítima nain sanulu resin sia (19) mak mate ona no hela nain ida de’it mak sei moris mak (Avo  Ines Magalhaes Goncalves) husi postu Atsabe, Munisípiu Ermera.

Informasaun Relevante : Direitu Justisa ba Vítima Segunda Guerra Mundiál (1942-1945)

Família vítima sira sei  kontinua hakilar ba lia loos no justisa ohin loron estadu haluha atu rekuinese vítima violasaun pasadu  ho nune`e ami husu no rekomenda :

1.     Husu ba Governu Japaun atu husu diskulpa formál ba vítima sira

2.    Husu Estadu Timor-Leste atu servisu hamutuk ho Estadu Japaun hodi fó rekuñesimentu formál ba vítima violasaun pasadu, funu daruak 1942-1945

3.     Husu ba Governu Timor-Leste hodi servisu maka`as  hodi halo reparasaun ba vítima sira nia dignidade

4.  Husu ba Estadu atu servisu makas hodi halo peskiza  ba istória invazaun Militár Japaun mai Timor-Leste ne'ebé sei haksumik hela

5.    Husu ba Estadu Timor-Leste liu husi Ministériu Edukasaun atu tau mós konsiderasaun ba istória pasadu invazaun militár Japaun mai Timor-leste, hodi integra istória nu'udar matéria  iha kurríkulu nasionál

6.  Husu ba Ministériu Edukasaun atu hadia kurríkulu nasionál no integra istória Timor-Leste iha kurríkulu nasionál.

Informasaun Relevante : Istória Segunda Guerra Mundiál Invazaun Militár Japaun Mai Timor-  Leste (1942-1945

Wednesday, January 31, 2024

HAK- ho Parseiru Estratéjiku Realiza Programa Auditória Sosiál Liu Husi Instrumentu  Kartaun Pontusaun Komunidade (KPK) iha Suku Gugleur

HAK- ho Parseiru Estratéjiku Realiza Programa Auditória Sosiál Liu Husi Instrumentu Kartaun Pontusaun Komunidade (KPK) iha Suku Gugleur

HAK

Liquiça 26 Janeiru 2024

Foto/ Diskusaun Kartaun Pontuasaun Komunidade (KPK)-Doc/HAK
HAK-hamutuk ho parseiru estratéjiku sira realiza programa auditórisa sosiál liu husi intrumentu kartaun pontuasaun komunidade-KPK Suku Gugleur, Postu Maubara, Munisípiu Liquiça. Objetivu mak atu identifika progresu no dezafiu sistema bee iha nivél Suku no hamutuk buka solusaun efetivu ba meloramentu bee no sustentabilidade liu husi faze partisipasaun, transparensia no  akuntabilidade, hodi kontribui ba planeamentu, investimentu no advokasia ne’ebé integradu iha nivél Suku, nivél Postu no Munisípiu ba fornesimentu bee ida sustentavel, seguru no inkluzivu.

Vice Diretór Sr. Antonino de Limas, iha ninia intervensaun subliña katak HAK nu’udar organizasaun ne’ebé luta ba direitus umanus desde tempu okupasaun Indonézia tau matan no defende direitu prizioneirus polítiku Timor-oan, ohin loron Timor-Leste hetan ona ninia independénsia HAK kontinua luta ba direitus umanus ho ninia dimensaun ne’ebé luan. Tuir konstituisaun RDTL atu hakonu direitu ekonómia sosiál no kultura -EKOSOK liu-liu ba asuntu bee moos nu’udar dereitu báziku ba ema nia moris no Estadu Timor-Leste  asina ona konvensaun internasionál ba direitu asesu bee moos nu’udar direitu umanus ho nune’e Estadu iha orbigasaun atu proteze no hakonu direitu sidadaun sira nian, maibé sidadaun sira mós iha dever  obrigasaun no responsabilidade ba fasilidade públiku sira ne’ebé Estadu hakonu ona .

Jestór Programa WaterAid Sr.Tome Guterres iha ninia intervensaun, haktuir katak lori WaterAid ho parseiru HAK, FHTL no GGFTL, hato’o agradese ba komunidade Suku Gugleur ne’ebé partisipa ona hodi halo diskusasun hamutuk ba bee moos liu husi Kartaun Pontusaun Komunidade-KPK. Prosesu ne’e la’o  tanba sosiedade sivíl hanesan liman ho ain Governu nian hodi hakonu no melhoramentu bee moos ba komunidade iha nivél rurál .

Prosesu KPK ne’e hamutuk ho parseiru estratéjiku sira hodi haforsa servisu Munisípiu liu husi  SMASA hodi dezenvolve planu estratéjia bee, saneamentu no ijiene (BESI) iha nivél munisípiu haree ba planu iha nivél Aldeia, Suku, Postu no Munisípiu. Asuntu BESI sai  prioridade ba Estadu atu tau atensaun maka’as. Liu husi enkontru KPK ne’e hodi haforsa WaterAid  ho ninia parseiru sira hodi bele dudu asuntu BESI iha nivél munisípiu no nasionál. Husu ba HAK atu bele kontinua toka nafatin, rekolha faktus mai husi komunidade hodi haforsa planeamentu sira nune’e hodi aprezenta ba nasionál tuir ezensia ne’ebé mai ho evidensia .

Administrador Postu Maubara, Sr. Alcino Freitas L. da Cruz iha ninia intervensaun subliña husu ba komunidade sira atu partisipa ativu, hanesan Autoridade Polítiku agredese ba WaterAid Timor-Leste ho ninia parseiru sira ne’ebé implementa ona programa KPK iha suku Gugleur, komitmentu autoridade nafatin servisu hamutuk ho parseiru sira hodi bele lori rezultadu atinjementu ba komunidade nian liu-liu bee moos. Postu mós husu ba Lideransa Autoridade Lokál Xefi Suku sira ne’ebé povu fó fiar ona presiza partisipa ativu tanba povu mak hili atu sai servidor, se ita la ativu iha enkontru sira ne’e dezafiu.

Koalia kona-ba bee, saneamentu no ijiene (BESI) importante tebes tanba bee liga ba ema nia moris, liuhusi diskusaun sira ne’e bele hetan deskobrimentu sira no buka solusaun. Hanesan Administrador Postu sei orienta Xefi Suku, Xefi Aldeia hodi halo levantamentu dadus kona-ba bee matan no sistema bee sira iha Maubara inklui Suku Gugleur, hodi nune’e bele aliña ho planeamentu nivel Postu nian. Postu Maubara iha komitmentu atu apoiu parseiru sira maibé presiza hametin liña kordenasaun, ba oin postu nafatin apoiu programa WaterAid, HAK, FHTL no GFFTL, tanba bee moos ne’e asuntu vital presiza ita hotu esforsu no kontribui. Iha ambitu ne’e Administrador Postu mós halo distribuisaun bebeirus Ai-Mahoni 100  ba komunidade sira iha aldeia Rai-Naba, Gugleur no Cai-Cassa atu kuda hodi proteze rai labele hetan risku ba dezastre naturais.

Diretór Servisu Munisípal Agua, Saneamentu no Ambiente -SMASA Sr.  Hermino da Costa Soares, ninia intervensaun subliña liu tan agradese ba WaterAid ho nia parseiru sira ne’ebé  ezesiste iha Munisípiu Liquiça desde inisíu tinan 2017 servisu makas iha asuntu BESI,  husu ba komunidade sira atu apoiu hodi hato’o informasaun ne’ebé detailus nune’e bele hetan fukun sira, ohin ita hamutuk iha ne’e hodi koalia kona-ba kartaun pontuasaun komunidade-KPK iha suku Gugleur, aldeia tolu mak sai prioridade  ba GMF (Small Grand) ho apoiu planu inisíu maibé presiza kriteria lubuk ida, nune’e husu komunidade sira atu partisipa ativu fó ideia no hodi hato’o kondisaun real ne’ebé mak iha, husu mós ba autoridade lokál sira nia papél importante iha suku hodi tau matan sasan hotu no partisipasaun tenke ativu.

SMASA rekursu umanus limitadu ho nune’e iha ona planu atu rekruta ba Fasilitador Postu Administrativu (FPA) atu servisu hamutuk ho komunidade sira ba iha bee rurál, SMASA tau matan  bee  rurál de’it, saneamentu konsentra iha urbana, nune’e mós tau matan ba ambiente liu-liu ba proteze bee matan no konserva bee matan sira, koalia kona-ba konservasaun no proteze bee matan, komunidade  sira dalaruma tesi ai maibé la hatene kuda tanba ai sira ne’e mak fornese hela bee, ai sira tesi hotu mak sei hamosu mudansa klima ho bai-loro naruk bee matan sira maran, presiza iha reflorestaun ba ai sira, postu Maubara bebeiros iha komuidade sira menus kuda ai-oan.

Patisipante iha enkontru ne’e mai husi reprezentante Aldeia Caicasa nain 5, reprezentante Aldeia Dair nain 6, Xefi Suku, Ofisial Polisia Suku, inklui komundiade sira iha Aldeia Rainaba ho parte interesada sira seluk. Partisipante iha diskusaun ne’e hamutuk 59, feto 15 no mane 44.


   

Monday, December 18, 2023

Rezultadu Monitórizasaun HAK ba Kondisaun Atual Bee Moos iha Munisípiu 8

Rezultadu Monitórizasaun HAK ba Kondisaun Atual Bee Moos iha Munisípiu 8

HAK

𝐊𝐨𝐧𝐝𝐢𝐬𝐚𝐮𝐧 𝐀𝐭𝐮𝐚𝐥 𝐁𝐞𝐞 𝐌𝐨𝐨𝐬 𝐢𝐡𝐚 𝐌𝐮𝐧𝐢𝐬í𝐩𝐢𝐮 (𝐀𝐢𝐥𝐞𝐮, 𝐀𝐢𝐧𝐚𝐫𝐨, 𝐁𝐚𝐮𝐜𝐚𝐮, 𝐕𝐢𝐪𝐮𝐞𝐪𝐮𝐞, 𝐃𝐢𝐥𝐢, 𝐄𝐫𝐦𝐞𝐫𝐚, 𝐋𝐢𝐪𝐮𝐢ç𝐚 & 𝐌𝐚𝐧𝐮𝐟𝐚𝐡𝐢) 𝐏𝐞𝐫𝐢𝐮𝐝𝐨 𝐌𝐚𝐫𝐬𝐮-𝟐𝟎𝟐𝟐-𝐎𝐮𝐭𝐮𝐛𝐫𝐮 𝟐𝟎𝟐𝟑

𝙍𝙚𝙯𝙪𝙡𝙩𝙖𝙙𝙪 𝙈𝙤𝙣𝙞𝙩ó𝙧𝙞𝙯𝙖𝙨𝙖𝙪𝙣
Ofisial HAK periodikalmente kada fulan 3 halo monitórizasaun ba asuntu direitus umanus, asuntu saúde, edukasaun, agrikultura, siguransa, asuntu rai & bee moos iha Munusípiu 6 (Baucau, Viqueque, Aileu, Ainaro, Dili & Ermera) hodi observa direta no entrevista ho Grupu Alvus Estratejiku-GAS no Diretóres Diresaun Munisipál sira hodi rekolia informasaun no dadus sira liga ho asuntu sira ne’ebé mak HAK tau matan ba. Iha relatóriu ida ne’e HAK sei fokus iha asuntu bee moos.

Dadus Atual Bee Moos

Dadus Atual Bee Moos
Husi gráfiku iha leten hatudu pursentu kondisaun asesu bee moos Komunidade iha Munisípiu 6, husi totál uma kain 66,363, fahe ba iha klasifikasaun tolu asesu ba kanalizasaun ho totál pursentu 70%, asesu ba bee matan totál pursentu 15% no asesu bee posu ho totál pursentu 15%. Amostra dadus balu hodi leno gráfiku iha leten: a) Munisípiu Viqueque 1) Suku Bibileo Komunidade uma kain 499 mak asesu ba bee posu no uma kain 190 mak asesu bee matan 2) Suku Bahalara-Wain Komunidade uma kain 900 mak asesu ba bee posu no uma kain 119 mak asesu bee matan 3) Suku Uma Tolu uma kain 761 mak asesu bee posu b) Munisípiu Baucau 1) Suku Tequinomata Komunidade uma kain 113 mak asesu bee posu 2) Suku Seisal Komunidade uma kain 425 mak asesu bee matan c) Munisípiu Ainaro 1) Suku Mulo Komunidade uma kain 1055 asesu bee matan 2) Suku Soro Komunidade uma kain 380 mak asesu bee matan 3) Suku Casa Komunidade uma kain 211 mak asesu bee matan d) Munisípiu Aileu 1) Suku Lausi Komunidade 113 asesu bee matan 2) Suku Liurai Komunidade uma kain 917 mak asesu bee matan e) Munisípiu Dili 1) Suku Camea Komunidade uma kain 561 mak asesu bee matan 2) Suku Becora Komunidade uma kain 393 mak asesu bee matan f) Munisípiu Ermera 1) Suku Estadu Komunidade uma kain 354 mak asesu bee matan 2) Suku Poetete Komunidade uma kain 319 mak asesu bee matan 𝑭𝒐𝒏𝒕𝒆𝒔: 𝑮𝒓𝒖𝒑𝒖 𝑨𝒍𝒗𝒖 𝑬𝒔𝒕𝒓𝒂𝒕𝒆𝒋𝒊𝒌𝒖-𝑮𝑨𝑺 Donwload File Kompletu versaun PDF-Tetun ;

Tuesday, December 12, 2023

HAK husu Governu atu Investe BESI liu 3% iha OJE-2024

HAK husu Governu atu Investe BESI liu 3% iha OJE-2024

HAK

Dili, 27 Novembru 2023 (Tatoli)-Koordenador Monitórizasaun no Advokásia , Asosiasaun HAK, Carlito da Costa, hateten Yayasan HAK husu ba Governu atu investe ba asuntu Bee moos, Saneamentu no Ijiene (BESI) liuhosi Orsamentu Jerál Estadu (OJE) 2024.

“Rekomenda ba Governu atu investe ba asuntu BESI tenke 3% hodi materializa programa IX Governu nian, katak asuntu BESI labele adia tan. Governu tenke kria sistema informasaun ida ne’ebé adekuadu no uniforme hodi apoiu iha planeamentu integradu  ba bee, saneamentu no ijiene.” Carlito da Costa hateten iha komprensia imprensa  ne’ebé realiza iha palapasu, segunda ne’e . Lee Kompletu


⌛Komferensia Imprensa liga ho asuntu kona-ba Subsidiu ba deputadu sira



HAK ho parseiru sira Komemora Loron Mundiál Direitus Umanus ba dala-75 (1948-2023)

HAK ho parseiru sira Komemora Loron Mundiál Direitus Umanus ba dala-75 (1948-2023)

HAK

Foto Komemora Loron Direitus Umanus ba dala-75/Doc-HAK

Dili, 10 Dezembru 2023-HAK ho parseiru sira Komemora Loron Mundiál Direitus Umanus ho tema “Sorumutu Hodi Hanoin Hamutuk ba Ita-nia Kondisaun Real Relasiona ho Asuntu  Agrikultura, Saúde, Edukasaun no Bee Moos, no Buka Dalan Hodi Hatán ba Dezafiu Sira”  (Iha Ámbitu Komemorasaun Loron Direitus Umanus ba dala-75, 1948-2023”)

Objetivu husi Sorumutu ne’e hanesa edukasaun sívika atu kontinua fó hanoin no sosializa ba  sosiedade Timor oan sira, liu-liu jerasaun foun sira kona-ba prinsípiu no valores demokrasia no direitus umanus.

Iha intervensaun husi Country Director WaterAid Timor-Leste, Sr. Justino da Silva salienta liu kona-ba Bee nu’udar Direitus Umanus ne’ebé sita  ona iha Deklarasaun Universál Direitus Umanus-1948 kona-ba direitu ba moris mesmu la sita spesifikamente kona-ba direitu ba bee moos. Iha tinan 2010 ofisialmente Organizasaun Nasois Unidas (ONU) deklara ona bee nu’udar direitus umanus. Inkorpora mós iha Konstituisaun RDTL artigu 6, koalia kona-ba dever Estadu nian atu asegura sidadaun nia moris ho dignu, moris di’ak isin no klamar. Bee tenke seguru, kualidade bee tenke tuir standar Standart Operasional Prosedur (SOP), nune’e ema bele konsumu ho di’ak no iha kualidade. Presiza asesivel ba ema hotu, nune’e laiha ameasa ba ema vulneravel sira hanesan inan feton no labarik feto sira waihira sira ba kuru bee.   

Iha intervensaun husi Diretór AJAR Timor-Leste, Sr. Jose Luis Oliveira sita relasiona ho direitu asesu baa i-han, Edukasaun no Saúde. Ezemplu balun kona-ba direitu ba ai-han relasiona ho normalizasaun presu ba merkadu li-liu ba presu fos ne’ebé subsidiu envez fó ba povu, maibé fó fali ba kompañia sira hodi kontinua habokur sira. Relasiona ho asuntu edukasaun kontinua problematiku ne’ebé Estadu ladun tau prioridade hodi investe ba kapasitasaun professor sira no kurikulum la la’o ho di’ak. Menus edukasaun sivika relasiona ho arte marsiais no joven sira. Relasiona ho asuntu saúde Estadu ladun seriu hodi tau importansia ba direitu sidadaun asesu ba saúde ho dignu. ai-moruk kontinua laiha, fasilidade saúde menus, laiha polítika investimentu ida di’ak hodi hatan ba nesesidade povu nian. Ligasaun ho direitu feto sira tinan 20 resin ona sai pior liu tan, justisa la funsiona ho di’ak, autoridade suku ba protesaun direitu feto sira la funsiona, prinsipiu igualidade la la’o, halakon subsidiu bolsa da mãe. Desizaun ba sira nia-an de’it, ne’e abuzu de poder, ne’e polítika violasaun direitus umanus.

Alein de ne’e, iha mós intervensaun husi Koordenador Rede ba Rai, Sr. Domingos de Andrade kona-ba direitu asesu ba rai; Estadu produs ona lei kuaze 21 ona, maibé asuntu direitu asesu ba rai kontinua problematiku. Eviksaun akontese iha fatin-fatin la konforma ho lei sira ne’ebé produs ona. Sidadaun kiik sira kontinua sai vítima ba desizaun sira relasiona evikssaun sira. Iha eviksaun balu maka seidauk hetan kompensasaun, no mesmu hetan kompensasaun maibé ladun justu ho kondisaun sidadaun sira nian. Maioria atu foti komunidade nia rai sempre ho razaun atu loke kampu de trabalho maibé na realidade la akontese. 

Analiza Sosiál Perspetiva D.U Relasiona ho Komemorasaun Loron Mundiál Direitus Umanus ba dala-75




⌛WaterAid Timor-Leste  Direitu Asesu Ba Bee moos




⌛Rede ba Rai (Direitu Asesu Ba Rai) Relasiona ho Komemorasaun Loron Mundial D.U.

Thursday, November 30, 2023

HAK Fasilita Formasaun Ba Guarda Prizionariu, Hodi Hametin Kualidade Lideransa, Komunikasaun no Psikolojia

HAK Fasilita Formasaun Ba Guarda Prizionariu, Hodi Hametin Kualidade Lideransa, Komunikasaun no Psikolojia

HAK

 


Reportajen Juvinal Cabral dos Santos

Atu hasae kapasidade guarda prizionariu konaba lideransa, komunikasaun efetivu, psikolojia no direitu nian, nune’e Asosiasaun HAK fasilita treinamentu ne’e, hodi tulun guarda sira atu bele hala’o sira nia serbisu ho diak liutan.

Iha treinamentu ne’e Diretor Ezekutivu Asosiasaun HAK Feliciano da Costa de Araujo, hateten formasaun ne’e ba guarda prizionariu fatin tolu  Bekora, Gleno no Suai sira partisipa hodi kapasita kona ba lideransa ho komunikasaun efetivu, psikolojia no oinsa sira iha sensibilizasaun kona ba direitu ida ne’ebé mak liga ba prizionariu sira, no ida ne’ebé mak liga ba guarda rasik

“Ita hakarak atu hametin kooperasaun entermos husi Asosiasaun HAK rasik ho guarda prizional sira, inklui ho ita nia prizoneiru sira, ida ne’e mak sai esensial hanesan ita hotu hatene katak HAK nia estabelesimentu ne’e iha tempu okupasaun  Indonesia ho nia asistensia ne’e ba liu prizioneiru politiku sira”, dehan Diretor Ezekutivu Asosiasaun HAK ba jornalista Neon Metin iha salaun Centro Nacional Chega CNC Balide, 30/11/2023”.

Nia hatutan agora ukun an ona tenke kontinua fo asistensia ba iha prizioneiru sira maibe la iha separasaun signifika hotu-hotu inklui mos ba iha guarda sira, atu nune’e sira fo asistensia ba prizioneiru sira hanesan familia ida maun alin no bin alin feton ho nan

Diretor HAK nee dehan atu bele hametin liu tan entermos hanesan ema Timoroan  prizioneiru sira tama prizaun laos tanba hahalok ne’ebé la di’ak maibe iha prizaun laran ne’e hanesan fatin hodi halo reflesaun, sira mos halo interasaun ho guarda prizioneiru sira nune’e hanesan familia nune’e prizioneiru sira bainhira fila ba komunidade familia nafatin ho guarda prizional.

“Foin lalais ita mos apoiu fundus uituan ba prizaun tolu hodi komemora 28 Novembro prizioneiru sira mos presiza animasaun, servisu ida ne’e mos laos HAK mesak ita iha mos redi servisu asuntu prizaun ninian,  ne’e iha organizasaun lubuk ida mos ita iha neeba inklui Ministeiro da Justica, PRADET, FOKUPERS, no PDHJ involve sira para oinsa atu deskute asuntu prizaun ninian para atu labele mosu tan buat ida torturasaun ne’e, dehan  Feliciano iha salaun Centro  Nacional Chega CNC Balide”, Feliciano dehan

Relasiona formasaun ne’e partisipasaun guarda prizional husi Becora nain 8, Gleno nain 7 no Suai nain 10 sira ne’e reprezentante ba prizaun fatin tolu  sira ne’ebé hetan oportunidade ona ne’e halo rotasaun seidauk tuir ne’e mak agora tuir fali no formasaun loron ida deit tanba tuir materia ne’ebé prepara.

Apoiu fundus  husi SAKSAS ba Asosiasaun HAK asina iha fulan Agosto simu $30.000 USD  ne’e ba fulan neen remata iha fulan Janeiru maibe fundus ne’e laos HAK de’it mak hetan parseiru hotu hotu mos simu ida ne’e, laos ba atividade formasaun ba guarda prizioneiru de’it maibe iha mos talk show, produsaun Voletim sira iha mos monitorizasaun ba iha prizaun tolu ne’e depois sei halo dialogu públiku, diretor ne’e deklara

Iha fatin hanesan Xefi Seksaun Seguransa Estabelesimentu Prizional Gleno, Manuel de Deus Soares hateten  formasaun ida ne’e bele kapasita sira nia an hanesan guarda tanba idade aumenta kapasidade menus tenke refres kadi beibeik nune’e kapasidade ezekusaun di’ak liu

“Sempre hasoru dezafiu mak la iha motivasaun ruma ba ami nia servisu la iha progresaun durante tinan ruanulu resin situasaun ne’e ita kompara  hanesan emerjensia hela de’it, ami nia tratamentu ba dadur sira iha Timor ne’e di’ak tuir estandar internasional no sira nia direitu ne’e asegura duni”, dehan Xefi Seksaun Seguransa Estabelesimentu Prizional Gleno

Nia hatutan, maske limita prizioneiru sira nia direitu balun labele movimentu ba mai maibe sira biban atu tuir formasaun oioin ne’ebé mak kapasita sira ikusmai hanesan baze ruma ne’ebé naton ba prizioneiru sira depois fila ba familia no sosiedade prontu ona hasoru moris ne’e

Entrentantu Xefe Sesaun ne’e deklara prizioneiru dadaun iha Gleno  hamutuk nain 99, feto nain 15, mane nain 84 nune’e husu governu bele tau matan nafatin ba prizaun hodi halo mudansa inklui fo mos motivasaun ba prizioneiru no mos ba guarda sira atu nune’e bele servisu ho di’ak nafatin

Fontes Orijinal ; Neon Metin Info

Link ; https://neonmetin.info/buletin/2023/11/30/hak-fasilita-formasaun-ba-guarda-prizionariu-hodi-hametin-kualidade-lideransa-komunikasaun-no-psikolojia/


HAK-Fasilita Formasaun ba Guarda Prizioneiru

HAK-Fasilita Formasaun ba Guarda Prizioneiru

HAK

Dili, 30 Novembru 2023

HAK-Fasilita Formasaun ba Guarda Prizioneiru

HAK-Fasilita Formasaun ba Guarda Prizionál husi Prizaun tolu ho tema “Optimaliza Kbiit Lideransa, Psikososial no Komunikasaun Efetivu ba Guarda Prizionál iha Prizaun Becora, Gleno no Suai Haree Husi Oklu Direitus Umanus”.

Foto Formasaun ba Guarda Prizional/Doc-HAK

Objetivu husi formasaun ida ne’e hanesan oportunnu ba Guarda Prizionál sira atu hametin liu tan koñesimentu kona-ba kualidade lideransa, emosionál no maneira komunikasaun oinsá bele sai enerjia hodi haforsa sira nia empeñamentu servisu sira la’o ho efisien liu tan.

Iha intervensaun badak husi Diretór Diresaun Nasionál Servisu Prizionál no Reinsersaun Sosiál (DNSPRS)

Sr. Delfio Alves, salienta katak materia workshop importante atu eleva liu tan kapasidade Guarda sira nian oinsá bele trata prizioneiru sira ho dignu no halo atendimentu sira la’os de’it atu kumpri lei sira, maibé tratamentu ida ho dignu, ho fuan tuir ita nia konsiensia.

Nune’e mós intervensaun badak husi reprezentante SASCAS, Sra. Laurinda Betti, sita katak Tema workshop ne’e importante, tanba Guarda P. Sira mak hasoru ema ho karakter oi-oin. Tuir lei, Guarda sira iha direitu atu hetan formasaun oi-oin, nune’e kontinua hametin sira nia koñesimentu ba tratamentu prizioneiru sira ho digno no respeita direitus umanus. Guarda sira presiza hetan tratamentu dignu mós, relasaun ho sira nia bem estar atu sira bele satisfas ho sira nia empeñementu servisu sira. Karik sira nia salariu ne’e sufisiente ba sira nia bem estar ka la’e? Tanba ne’e nia efeitu bele afeta psikolojikamente iha sira nia uma laran ka iha servisu fatin.

Foto Formasaun ba Guarda Prizional/Doc-HAK


.    

 

  

Monday, November 27, 2023

 Rezultadu Deskobrementu HAK  iha Munusípiu 6 Menus Bee Moos

Rezultadu Deskobrementu HAK iha Munusípiu 6 Menus Bee Moos

HAK

Kondisaun Asesu  Bee Moos Komunidade Rural/Doc-HAK

Bee moos, saneamentu no Ijene nu’udar direitu umanus ne’ebé labele haketak ho ema nia moris. Investe iha bee moos no saneamentu nu’udar meius ida atu melõria di’ak liu tan iha setór saúde, agrikultura, edukasaun, meiu-ambiente hodi haburas kresimentu ekonomiku, moris di’ak sidadaun sira nian inklui hadia oportunidade ba empregu no produtividade nasaun nian. Estadu liu husi Governu esforsu oi-oin atu hakonu direitu fundamnetu ida ne’e. Biar nune’e asuntu bee moos sei kontinua problematiku tanba komunidade balu kontinua la asesu bee ho di’ak.

Rezultadu deskobrementu HAK, ba kondisaun asesu bee komunidade iha Munusípiu 6 (𝑩𝒂𝒖𝒄𝒂𝒖, 𝑽𝒊𝒒𝒖𝒆𝒒𝒖𝒆, 𝑨𝒊𝒍𝒆𝒖, 𝑨𝒊𝒏𝒂𝒓𝒐, 𝑫𝒊𝒍𝒊 & 𝑬𝒓𝒎𝒆𝒓𝒂), ho totál 𝐒𝐮𝐤𝐮 𝟓𝟔, 𝐚𝐥𝐝𝐞𝐢𝐚 𝟑𝟑𝟖, totál populasaun Rihun Atus tolu Ualu, Atus Rua Sanulu Resin Tolu (𝟑𝟎𝟖,𝟐𝟏𝟑) no mós total uma kain Rihun neennulu Resin Neen, Atus Tolu Neennulu Resin Tolu (𝟔𝟔,𝟑𝟔𝟑). “Klasifika :

1. Uma kain ne’ebé asesu kanalizasaun totál rihun haat nulu resin neen, atus rua sanulu (𝟒𝟔,𝟐𝟏𝟎) 𝐤𝐚 𝟔𝟗,𝟔𝟑 %)

2. Uma kain ne’ebé asesu bee matan totál rihun sia, atus ualu haat nulu resin sia (𝟗,𝟖𝟒𝟗) 𝐤𝐚 𝟏𝟒, 𝟖𝟒 %)

3. Uma kain ne’ebé asesu bee posu totál rihun sanulu, atus tolu haat (𝟏𝟎,𝟑𝟎𝟒) 𝐤𝐚 𝟏𝟓, 𝟓𝟑 %).

𝐇𝐀𝐊 ho Parseiru realiza Auditoria sosiál liu husi mekanismu diskusaun 𝐊𝐚𝐫𝐭𝐚𝐮𝐧 𝐏𝐨𝐧𝐭𝐮𝐚𝐬𝐚𝐮𝐧 𝐊𝐨𝐦𝐮𝐧𝐢𝐝𝐚𝐝𝐞-𝐊𝐏𝐊 𝐢𝐡𝐚 𝐒𝐢𝐬𝐭𝐞𝐦𝐚 𝐛𝐞𝐞 𝐫𝐮𝐫𝐚𝐢𝐬 𝟒𝟏, 𝐢𝐡𝐚 𝐌𝐮𝐧𝐢𝐬í𝐩𝐢𝐮 (𝐌𝐚𝐧𝐮𝐟𝐚𝐡𝐢 𝟐𝟏 𝐋𝐢𝐪𝐮𝐢ç𝐚 𝟐𝟎).

Husi rezultadu auditoria sosiál hatudu katak sistema bee sira ne’ebe mak harii ona tinan rua ba leten hasoru desafiu iha ninia operasaun no manutesaun tanba barak mak aat no la funsiona. 𝐇𝐮𝐬𝐢 𝐬𝐢s𝐭𝐞𝐦𝐚 𝐛𝐞𝐞 𝟒𝟏 𝐧𝐞𝐞𝐛é 𝐦𝐚𝐤 𝐇𝐀𝐊 𝐡𝐚𝐥𝐚𝐨 𝐚𝐮𝐝𝐢𝐭𝐨𝐫𝐢𝐚 𝐬𝐨𝐬𝐢á𝐥 𝐡𝐚𝐭𝐮𝐝𝐮 𝐤𝐚𝐭𝐚𝐤 𝟕𝟔 % 𝐦𝐚𝐤 𝐞𝐬𝐭𝐫𝐮𝐭𝐮𝐫𝐚 𝐆𝐌𝐅 𝐥𝐚 𝐟𝐮𝐧𝐬𝐢𝐨𝐧𝐚. Estrutura GMF la funsiona kontribui ba sistema bee la funsiona ho efetivu.

 Amostra dadus deskobrementu Bee moos komunidade iha Munisípiu 6 ;

a) Munisípiu Viqueque

1) Suku Bibileo Komunidade uma kain 499 mak asesu ba bee posu no uma kain 190 mak asesu bee matan

2) Suku Bahalara-Wain Komunidade uma kain 900 mak asesu ba bee posu no uma kain 119 mak asesu bee matan

3) Suku Uma Tolu uma kain 761 mak asesu bee posu

b) Munisípiu Baucau

1) Suku Tequinomata Komunidade uma kain 113 mak asesu bee posu

2) Suku Seisal Komunidade uma kain 425 mak asesu bee matan

c) Munisípiu Ainaro

1) Suku Mulo Komunidade uma kain 1055 asesu bee matan

2) Suku Soro Komunidade uma kain 380 mak asesu bee matan

3) Suku Casa Komunidade uma kain 211 mak asesu bee matan

d) Munisípiu Aileu

1) Suku Lausi Komunidade 113 asesu bee matan

2) Suku Liurai Komunidade uma kain 917 mak asesu bee matan

e) Munisípiu Dili

1) Suku Camea Komunidade uma kain 561 mak asesu bee matan

2) Suku Becora Komunidade uma kain 393 mak asesu bee matan

f) Munisípiu Ermera

1) Suku Estadu Komunidade uma kain 354 mak asesu bee matan

2) Suku Poetete Komundade uma kain 319 mak asesu bee matan

HAK nia observasaun jeral, Kondisaun komunidade nian asesu ba bee matan no bee posu kontinua akontese tanba investimentu Orsamentu Jeral Estadu-OJE ba asuntu infraestrtura bazika seidauk adekuadu, asuntu mudansa klimatika. Mudansa klimatika rekursu natureza ne’ebé afetadu liu mak bee tanba iha tempu bai loro rekursu bee matan menus, halo bee maran no iha tempu udan akontese inundasaun estragus ba bee matan protejidu sira, ida ne’e fó impaktu komundiade sira la asesu bee ho kualidade no di’ak, liu-liu labarik no feto sira. Sita sira nia tempu barak liu ba kuru bee no sira lakon servisu produtivu sira ne’ebé loloos tenke halo.

Kondisaun seluk kresimentu populasaun ne’ebé kontinua aumenta ezije liu tan demanda ema nian asesu ba bee. La iha sistema informasaun bee saneamentu no ijiene-BESI ne’ebé bele kontribui ba entidade estadu sira atu elabora planeamentu ne’ebé korespende ba kondisaun komunidade sira nian asesu bee tantu iha área rurais no mós área urbana. GMF servisu ho voluntariamente, komunidade sira seidauk senti sai nain ba sistema bee sira ne’ebé mak Estadu liu husi Governu, Parseiru Dezenvolvimentu sira harii Kondisaun seluk mós komunidade barak mak hela iha knua antigu/foho leten ne’e susar atu kanaliza sistema bee ba sira.

HAK fiar tebes, Komitmentu programa IX Governu nian ne’ebé investe ba Bee moos no Saneamentu báziku labele adia tan. Hein katak durante periodu tinan lima, Governu iha pleaneamentu ba investimentu ida ne’ebe adekuadu, kria mekanismu koordenasaun ho instituisaun sira seluk ne’ebé efetivu hodi dezenvolve no kontribui ba mudansa ne’ebé boot asesu komunidade nian ba bee moos ida seguru, sustentavel no inkluzivu.

Download File Konferensia Imprensa versaun PDF

 

Estrutura Ezekutivu HAK

  • Feliciano da C. AraújoDiretór Ezekutivu HAK (Tlf:78164385)
  • Antonino de LimasVice Diretór I(Tlf:73111090)
  • Victoria L. FernandesVice Diretór II(Tlf:77556669)
  • Sabino MedonçaKoordenador Edukasaun no Publikasaun (Tlf:77187711)
  • Carlito da CostaKoordenador Programa no Advokásia(Tlf:78123127)