Komunikadu Emprensa Dignifika Vítima Jugun IANFU

 

Ekipa Konjunta Ezizi  “ Dignifika Vitima Jugun Ianfu” Komunikadu Emprensa

Bem vindu Sua-Exelénsia Ministru Negósiu Estranjeiru Japaun, Sr. Taro Kono ne’ebé vizíta mai Timor-Leste.

Apresia no louva tebes relasaun diplomasia pol’itika mutual entre Japaun ho Timor –Leste ne’ebé hahú iha 2002 to’o agora. Ami rekoñese katak iha apoiu oi-oin ne’ebé gradualmente mai husi Governu Japaun ba ami nia Governu iha tinan 16 nia laran no apoiu hirak ne’e sei kontinua iha futuru liu husi ajensia dezenvovlimentu sira.

Maski nune’e,  ami haree iha lidun balun Inan Feton sira hafalun ho fuan fitar ne’ebé uluk sofre husi aktus militár Japaun iha tempu segundu Guerra Mundiál (1942-45) dadaun ne’e sei kontinua halerik ho sira nia sentimentu no kous mesak todan pasadu iha nia moris durante tinan naruk nia laran. Kuaje situasaun ne’ebé hanesan mós parte família sira hasoru iha sira nia hela fatin.

Tuir Asosiasaun HAK nia dadus deskobrementu feto nain 20 ne’ebé mak konsege ho aten brani haktuir sai sira nia istória nakukun ba hahalok imoral no brutalismu husi tropas japoñes, iha  segundu Guerra mundiál (1942-45) no vitima sira agora iha kondisaun mizeravel husi aspetu fisiku no shykolojia tanba hetan sofrementu oi-oin ne’ebé esktrimamente nakonu ho depresaun ekstraórdinariu nia laran.

Tan ne’e, ami fo hanoin ba Sr. Taro Kono atu lori lia tatoli ne’e ba Sua Exelensia  Primeiru Ministru Japaun Sr. Sinzo Abe atu prudentimente ho fuan boot hodi labele ignora vítima ho família sira ne’ebé infrenta situasaun kruel.

Ami mos husu atu hametin liu tan relasaun polítika diplomasia rai rua ne’ebé mak metin maibé labele ABANDONA vítima Jugun Ianfu iha tempu segundu Guerra Mundiál ne’ebé la’ós de’it iha Timor maibé mós iha fatin seluk, mak hanesan: KOREA DU SOLU, THAILANDIA, FILIPINA, MALAYSIA, INDONEZIA no JAPAUN rasik ne’ebé agora dadaun ne’e hela iha situasaun mizeravel nia laran.

“ Ignora no abandona ezensia lialos no justisa ba vítima Jugun Ianfu  nu’udar aktu krime grave no violasaun direitus umnaus foun iha tempu agora”.

 

Dili, 12 Outubru 2018

Ami mak hato’o